13 giu 2013

Caramellas non ndi boleus prus

Teneus duas maneras de biri sa Sardìnnia oindii e de da pentzai po comenti at a podi essi in su tempus benidori.

Sa prima manera est cussa de is chi si binti a un’oru de su mundu e funt sèmpiri prangendi miséria e pedendi limusina:”Seus pòberus, seus ísula, iaus a podi bivi de turismu, teneus su mari prus bellu de totus, ma teneus abbisòngiu de cosa meda, tocat a fai fàbbricus po turistas, si serbit sa zona franca, si serbint linias navalis e aèreas baratas, iat a essi mellus a sfrutai totu su chi teneus ca su fàmini est meda, e beneitus is chi s’agiudant, ant a fai dinai po issus, ma calincuna cosa dd’ant a donai a nosu puru.”

S’àtera manera est cussa de is chi creint chi tochit a incumentzai de is sardus, de is chi creint ca is sardus funt s’arrichesa prus manna chi teneus e duncas pentzant ca podeus essi nosu a totu a si ndi scabulli de is problemas chi teneus chena de pedi limusina a nemus, ma ponendi dinai in scolas, universidadis, ammaistramentu, e frimendi su beni mannu de connoscéntzia chi dònnia dii lassat s’ìsula cun is cambas de is nostrus mellus laureaus. Creint puru ca sa Sardìnnia depit curri in totus is camminus de sa modernidadi, ma chena de nci fuliai nudda de su chi est stétia finas a oii. Massaria, indústria, servítzius, nci funt de fai unu muntoni de cosas, ma iaus a depi podi sceberai e decidi intra nosu, castiendisí in faci chena lassai a àterus a decidi de su tempus benidori nostru e de is fillus nostrus e chena de arregalai a nemus su beni chi teneus po pagus caramellas.

Un’esempru de sardus chi dda pentzant a custa manera dd’agatais in is arrelatas de TEDxViaTirso.

Via Maxima: Posted on 

Leave a Reply